UiO får ny språkpolitikk frå februar neste år
Etter den føreslåtte planen skal ei arbeidsgruppe med representasjon frå tilsette, studentar og eksterne utnemnast i løpet av denne månaden. Frå juni til oktober skal gruppa utvikla framlegg til ny språkpolitikk, og det skal vera på bordet den 31. oktober. Fram til den datoen skal det skipast til innspelmøte, gjennomførast dialog med mellom andre studentar, internasjonalt tilsette og andre grupper. Frå november til desember skal utkastet frå arbeidsgruppa bli sendt ut på høyring til fakulteta og på opa høyring på heile universitetet. Og i møtet i februar, skal Universitetsstyret vedta den endelege språkpolitikken, som vil begynna å verka frå same stund.
Styrerepresentantar ville ha arbeidsgruppe
Dermed har styrerepresentantane som tok til ordet for at det burde opprettast ei arbeidsgruppe som kan føreslå ein ny språkpolitikk, fått medhald hos UiO-leiinga. I det førre møtet var representant for dei mellombels vitskaplege tilsette Anniken Hotvedt Sundby heilt klart på at UiO burde fylgja det same opplegget som både Universitetet, Bergen, NTNU og Universitetet i Agder hadde vedtatt for ny språkpolitikk. "- Der har dei sett ned ei eige arbeidsgruppe som skal utarbeida språkstrategi," peika ho på. Ho fekk støtte både styrerepresentantane for dei fast vitskaplege tilsette Ingrid Lossius Falkum og Finn-Eirik Johansen. Også ekstern representant Qaisar Farooq Akram gav støtte til innspelet frå Hotvedt Sundby. "- Det er ein god idé å opprette ei arbeidsgruppe," meinte han. Også dei andre representantane som tok ordet var positiv til dette.
UiO-rektor Svein Stølen noterte seg ønska og forslaga frå representantane når det gjeld utforminga av ein ny språkpolitikk for UiO.
"- Me skal koma tilbake til dette," lova han.
Blir bedne om å slå ring om viktige prinsipp
No føreslår universitetsdirektør Arne Benjaminsen at Universitetsstyret vedtar forslaget om både om å utnemna ei slik arbeidsgruppe og mandatet for gruppa på møtet førstkomande tysdag. I bakgrunnsnotatet vert fleire av prinsippa som må takast vare på, trekte fram. Det handlar mellom anna om at språkpolitikken ved universitetet skal utformast slik at den tar vare på og utviklar bruk av norsk språk og fagterminologi. Det vert dessutan lagt vekt på at UiOs rolle som internasjonalt forskingsintensivt universitet må takast vare på. Ein ventar også at studentar skal kunna kjenna til og bruka eit fagspråk både på norsk og engelsk, eller eit anna framandspråk. Av dei tilsette vert det venta at dei har gode kunnskapar om både norsk og engelsk, går det fram av sakspapira.
Går vidare med planar om å slå saman OD og MED
Som Uniforum melde rett før helga, vil universitetsleiinga gå v
