Fagpressenytt

I september døydde den kurdiske studenten Mahsa (Jina) Amini i moralpolitiets varetekt i Teheran. Grunnen til at ho hadde blitt hanka inn var fordi ho ikkje hadde hatt hijaben på seg heilt etter føreskriftene. Dødsfallet gjorde inntrykk på både unge og eldre i Iran, og førte til store demonstrasjonar av unge og eldre i byar over heile landet og også i andre delar av verda. Dei iranske styresmaktene har møtt demonstrantane med vald, og så langt er 516 demonstrantar drepne av politiet, ifylgje BBC som refererer til Human Rights Activists' News Agency. I tillegg har dei iranske styresmaktene så langt avretta fire av demonstrantane. Fleirtalet av demonstrantane har vore svært unge.

- Ingen blei dømde for drap

UiO-professor i medisin Mahmood Amiry-Moghaddam er leiar for Iran Human Rights, og han fylgjer nøye med på situasjonen i Iran og har sett på bakgrunnen for dei fire dødsdommane.

- Dei blei dømde for det dei iranske styresmaktene kallar for "Moharebeh" som vil seia krig mot gud og for å spreia frykt blant folk eller «korrupsjon på jorda", og for å ha deltatt i protestane. Ved to tilfelle blei to medlemar av basidj-militsen drepne, og i eitt tilfelle blei ein basidj-milits såra. Så ingen av dei blei dømde for drap, fortel han til Unifrum.

Dei siste avrettingane har ikkje stansa demonstrasjonane, derimot har dei kome i gang igjen med like stor intensitet som før.

- Fryktbarrieren er rast saman

Mahmood Amiry-Moghaddam meiner dei siste demonstrasjonane skil seg radikalt frå tidlegare protestar mot makthavarane i Iran.

- Det har aldri skjedd noko liknande i dei 17 åra Iran Human Rights har eksistert. Som dagleg leiar overvakar me situasjonen dagleg.På den eine sida ser me at den fryktbarrieren som regimet hadde styrt på i alle desse åra, den er rast saman. Folk er ikkje redde lenger. Fleirtalet av folket i Iran ynskjer ikkje berre eit regimeskifte, men også grunnleggjande menneskerettar som dei aldri nokon gong har hatt. På den andre sida prøver regimet å halda på makta og brukar alle verkemiddel for å gjera det.