Fagpressenytt

Om det kom brått på deg at Jan Erik Fløtre vart leiar i Nortura, så var du ikkje aleine. Det kom brått på han sjølv, også.
Så brått at det første spørsmålet Bondebladet stiller han i stova hans mellom fjella i Byrkjelo, rett og slett er om det er ein jobb han har lyst på.
- Nei, det har eg ikkje tenkt så mykje på. Dette vart fort og brutalt, innrømmer han.

Skrekkblanda fryd
Tysdag 29. august kom nyheita om at Trine Hasvang Vaag trakk seg som styreleiar i Nortura med umiddelbar verknad. Årsaka var at ho hadde stilt mistillitsforslag mot konsernsjef Anne Marit Panengstuen. Grunngjevinga var mellom anna manglande informasjon og mangelfullt beslutningsgrunnlag.
Samtlege av dei andre i styret stemte mot mistillitsforslaget. Dermed gjekk Hasvang Vaag av.
- Då ho trakk seg, skjønte eg konsekvensen av at eg var nestleiar. Det var litt skrekkblanda fryd. Alvoret over det. Folk seier at ein må puste med magen, og ta det med ro. Slik vart det, eg var nestleiar. Det var ikkje dette som var planen i det heile, fortel Fløtre no.
- Då du vart vald som nestleiar, hadde du i det heile tatt tenkt tanken at du kunne ende som styreleiar, om noko skjedde?
- Nei, eigentleg ikkje. Nestleiar hadde eg heller ingen planar om å bli. Det var noko som kom til undervegs, fortel han.

Ballen rulla
Desse orda kan også vere ein passande beskriving på korleis han vart bonde.
Jan Erik Fløtre vaks opp på garden i Byrkjelo i Nordfjord. Men han har ikkje «alltid visst» at han skulle bli bonde sjølv.
Etter vidaregåande reiste han i militæret. Deretter jobba han som avløyser eit år, før han vart sjåfør. Han og kona Viviann budde på den tid i nabokommunen Stryn. Kona sa frå at dersom dei skulle flytte til Byrkjelo, skulle dei gjere det før yngstedottera begynte på skulen.
- Det vart bestemt at vi skulle flytte heim igjen og byggje hus. Det vart eigentleg berre slik. Viss eg går tilbake til då eg slutta på vidaregåande, var det ingen plan, eigentleg, erkjenner Fløtre.
I 2001 tok han over garden. I 2011 vart han tillitsvalt i Nortura.
- Og så har den ballen berre balla på seg, seier han.
I 2017 kom han inn i styret i Nortura, og i 2021 vart han nestleiar.
Og no er han jammen leiar, også. Ballen har rulla heilt til topps.

For langt borte
- Du er ein bonde frå Byrkjelo med berre vidaregåande skule, som no leiar eit milliardkonsern som slit. Korleis følast det?
- Eg er kjempeglad for at vi er eit godt styre med mykje ulike folk og kvalitetar. Det er ei vanskeleg oppgåve. Styret er heilt avhengig av ein veldig god administrasjon, seier Fløtre.
Styreleiaren forsikrar om at han har full tillit til konsernsjefen.
- Kva har vore den vanskelegaste saka du har sete i styret og avgjort?
- Kyllingsaka var ei tøff avgjersle