På måndag kom tala sin klare tale frå Samordna opptak: Dei unge skyggjer vekk frå tradisjonelle realfag og i endå større grad frå lektorutdanninga i realfag.
Dagen etter var krisa temaet for ein debatt i Domus Bibliotheca på Universitetet i Oslo. To av dei tre som først skreiv om realfagskrisa og det grøne skiftet i eit innlegg i Khrono, UiO-rektor Svein Stølen og NTNU-rektor Anne Borg heldt først kvar sine korte innleiingar.
- Me må gjera noko no, det er berre å sjå på søkjartala. Det var derfor UiO, NTNU og NHO saman kom med eit varsko etter at me hadde blitt oppfordra til det av Mat.nat.-dekan Solveig Kristensen og Jona Bakken, fagleg leiar for Lektorprogrammet på UiO.
SKREIV FELLES KRONIKK: NTNU-rektor Anne Borg og UiO-rektor Svein Stølen skreiv saman med NHO-direktør Ole Erik Almlid ein kronikk om konsekvensane av realfagskrisa for det grøne skiftet. I går møttest dei i Domus Bibliotheca. (Foto: Martin Toft)
- Me og samfunnet er avhengige av at fleire unge tar realfag
Og Anne Borg som er rektor for eit universitet som tilbyr utdanning for dei som vil bli lærarar både i grunnskulen og i den vidaregåande skulen, trudde ikkje det er mangel på interesse for realfag blant barn flest.
- Det har i høgste grad vore stor interesse for naturfag hos dei unge, før dei kjem til ungdomsskulen, peika ho på.
- Me og samfunnet er avhengige av at fleire unge tar realfag. Ein kombinasjon av naturfag og matematikk kan vera vegen å gå, trudde ho etter å ha hatt samtalar med NHO-direktør for kompetanse og innovasjon, Rebekka Borsch og Kunnskapsdepartementet om dette.
Realfagskrise nemnt første gong for 22 år sidan
Jonas Bakken, fagleg leiar for Lektorprogrammet på UiO, gav ei kort historisk innføring i realfagskrisa.